各位議員，準備好聽日拉布未呀？社民連長毛梁國雄決定將新一輪拉布動議，「帶大家跳出香港睇社會保障」，同大家瞬間看地球，建議政府應該同唔同國家加強交流，檢視各國退休保障制度有咩值得借鏡嘅地方，以改善本港社會保障制度。
建制派「人盯人」抗衡
長毛將一個國家變成一個動議，一共促請政府同90個唔同國家交流，包括蒙古、北韓、柬埔寨、巴基斯坦、東帝汶、不丹、烏茲別克、甚至不時戰火衝天嘅阿富汗、伊朗、伊拉克、黎巴嫩、巴勒斯坦……真係講都講唔晒。查實目的只有一個，就係希望政府畀70歲以上長者免資產審查，同埋推行全民退休保障計劃。
可以肯定嘅係，即使80日環遊世界之後，政府都唔會讓步；而長毛亦肯定，佢會繼續提出更多修訂去拉布。負責炮製修訂嘅社民連黃浩銘話，諗緊提出促請政府成立一個社會保障委員會，就退休進行諮詢，成員不能少於N人，之後就逐個數字提出修訂。N代表咩？唔知㗎，1到100唔定，1到1,000都唔定㗎！
建制派議員想唔出席都冇辦法，好似金融界吳亮星都同八方呻，極之不願意同長毛再咁樣打仗，提議建制派採取「人盯人」戰術，即係為咗確保議案被否決，總之泛民出席有幾個多人喺個議會，建制派就派幾多人落去反對，令其他人可以稍為休息，為長期拉布作好準備。
mailto:[email protected]