美劇《90210》女星AnnaLynne McCord，出道幾年拍過唔少人氣劇集，但硬係爭啲運，令事業未能更上一層樓，所以佢開工嗰陣特別搏命，連替身都懶得用。好似噚日AnnaLynne喺洛城為《90210》開工，咪睇佢着住吊帶貼身長裙就會好斯文，劇情講佢搏晒命去追架外賣車，唔知係俾個車窗卡住隻手定點，半天吊嘅AnnaLynne肉緊到面容扭曲，好鬼驚會跌落車，好彩最終都能夠碌入車廂內。既然演得咁專業，梗係值得好似《喜劇之王》咁俾盒飯AnnaLynne食啦，佢亦風騷到叉腰趷籮嚟擺甫，話俾人知「我真係好好戲㗎」。