吃晚飯總不愛叫套餐的，大有人在，更何況MINI Cooper天生一副百搭相，而且裏裏外外的改裝配件多如繁星，英國餐還是日本菜任君選擇，自己慢慢襯、散叫逐樣執，不單止更有個人特色，又好玩又有滿足感，自家砌亦是一種樂趣。
記者：許維雅 攝影：潘志恆、黃子偉
自家散叫 必合胃口
粉紅癡 貼過萬粒水晶
車主：Fanny 職業：時裝生意
當年未有車牌的Fanny，對車沒有太大興趣，就連MINI是甚麼也不知道。直至有次於銅鑼灣見到一部開篷MINI，「架車好靚，後來先知佢叫MINI！」立刻走去學車，07年擁有人生第一架車就係MINI的R50，「新牌最好買舊車，我見舊車就覺得點玩都得，改到成架粉紅色，感覺好開心，出街多人望就更加有滿足感。」揸車上手後，2010年見MINI推出Camden限量版，新車照辦煮碗再整，更將全車貼滿水晶，特別版原有的Options幾乎唔見晒，車身顏色都唔要，那為何要選擇買特別版改裝？「限量版嘛，我就係鍾意呢三個字，哈哈。」
全車粉紅bling bling加Hello Kitty的主題，今次還有原廠代理出手相助，「訂車時我同廠直接要求改用淡粉紅，我給他們色版幫我溝色，最後給了我三隻色揀，我揀了這隻珍珠白底的粉紅色。訂車後更立即於網上訂購所有配件，仲專登買多一套燈殼、鬼面罩及內櫳等，再去批發買一大堆水晶回去逐粒逐粒貼，花了大半年，等車一到就叫廠幫我成套換番晒上去。我知道成件事好麻煩，但只要你講到想要甚麼，MINI其實都肯配合你盡量同你玩，這就是MINI！」全車改裝花費約十幾至二十萬是其次，裏裏外外過萬粒約50件的水晶配件叫你逐一貼的毅力，就並非人人做得到。
為媽媽自製自動波JCW
車主：Ashely Lai 職業：學生
認為MINI於英國代表Working Class，喜歡它形象獨特，唔似其他車只賣Luxury的人很多，Ashely的爸爸是其一，「我爸爸Paul好細心，佢雖然好鍾意MINI JCW，但因為只得手波，為了方便媽媽駕駛，寧願買一架Cooper S自己改成JCW版。佢話其實自己改，自主性更強，滿足感更大喎。」全車主力性能上的改動，包括車胎、輪圈、車頭、避震、Piping、電腦Chips等，Parts來自英美日各地。死氣喉及尾翼專誠由日本運返來；Intercooler來自美國品牌Alta，「爸爸以前份工周圍飛，去到日本見到NEEZ輪圈好靚，就忍唔住買返來幫架車扮靚，七千幾蚊一隻㗎。爸爸話改裝時盡量希望用返JCW原裝，MINI改裝Parts選擇太多，佢花了好多時間上網做功課，特別偏好英美品牌，佢話因為工作上，英國美國公司幫佢搵到錢，有啲情意結啦。」講到改裝花費多少？「哎呀，媽媽話唔想聽呀，不過爸爸靜靜雞話我知前前後後約廿幾萬，改裝了幾多件？爸爸都數唔到喇！」
改上癮 外表至上
車主：Edmund 職業：化工生意
別看這部開篷MINI JCW改到如此招搖，其實車主Edmund很低調不願上鏡，「費事俾老竇哦。」09年買了部開篷JCW R56，引擎已升級，但自己再改谷大馬力，連同輪圈、碳纖件、錶板、包圍、避震及軚環等花了共三十萬。「這是我第三架MINI，睇日本汽車雜誌，見他們改得又型又誇張，十分鍾意。玩車那一班，我算是揸得最慢那個，改完性能上有幾好是其次，我比較着重外觀。」為何喜歡改車？「純粹鍾意改車，MINI改完視覺上可以好唔同，但你依然會好享受駕駛，又代表到自己。」這車古靈精怪位都在內櫳，有幻彩色椅背的JCW桶椅，「椅背是專誠叫寶馬幫我噴，我想改色，碰巧他們試色，我就揀了這隻怪色。」還有將軚環送過去日本包碳纖，「整個碳纖位好靚，手工真係好好。」此外，一支轉波時會有波段顯示的波棍，這支MK味甚濃的波棍原來是原廠的，配合來自日本品牌的錶板、水溫錶等裝飾，好有誇張化的日本改裝車味道。
舊款操控更Raw
車主：Gary 職業：時裝批發
鍾情MINI細細架夠得意又多人望的Gary，曾擁有R50、R56及R53等車款，這是他第五架，「MINI的駕駛樂趣是非一般車可以給你！」最近花了七萬幾元買了部舊款Cooper S大玩改裝，有新的唔玩，玩部舊的？皆因鍾情上一代MINI的操控性，「感覺較實在，好揸好多，加強性能後，操控感覺好Raw，加上將一部舊MINI變到好似好勁咁，仲好玩，哈哈。」除Rebuild引擎、換了氣喉、火嘴及Oil Cooler，亦Upgrade了制動系統及換上17吋輪圈，前後搞了一個月，花了十三、四萬，「起步好過原裝好多，現在感覺十分爽快，猶如全新車。」Gary的改裝喜好以日牌為主，DuelL AG是他至愛，「價錢較高，但配件又齊又靚，原廠款式相對保守，唔夠激進。」
黑中黑全碳纖
車主：Benny 職業：會計
作為New Mini Club HK會長的Benny，代表作是將一部Countryman玩全碳纖，「02年第一代開始擁有MINI，最初被外表吸引，及後其操控表現令我繼續沉迷。」這是他第三部，別以為Countryman少人改，四門五座的設定其實有更大吸引力。「今年五月去了MINI United嘉年華，見到好多落場MINI改裝碳纖改得好靚，回港立刻訂車，同步上網訂了一大堆碳纖件。」全車超過30份碳纖配件包括頭尾燈、車櫳裝飾、裙腳等連同Blisten PSS避震、Brembo迫力等共二三十萬，其實仲有鬼面罩、頭唇及尾翼仍在運送回港途中，這架黑碳纖還有排變身。
貼紙最好選原廠
於香港為MINI整色整水，收費視乎要求。好似車身滿佈五顏六色的彩畫，Mini Pit的Joe哥就話呢類咁誇張的圖案要成幅圖印刷再逐部份貼，大概要一萬元。「香港最普遍係簡單啲嘅粗間拉花、貼車頂或車側沙板位等，人工費約二千。最好買原廠貼紙，尺碼位置較Fit，質素好亦會好貼啲，無咁易甩色傷咗底漆。」避免日灑雨淋，貼紙可保存兩至三年，最後，貼紙若然跟車身顏色有出入，記住去運輸署改牌簿呀。Mini Pit：2364 1666
網上參考得意MINI
