籃球巨人姚明噚日抵港，下晝接受港大頒發嘅名譽社會科學博士學位，表揚佢喺球場上嘅成就，同埋推動國際社會對愛滋病毒關注嘅貢獻。「昂藏七尺」嘅姚明同主禮隊伍步入會場，即惹嚟全場起哄！周圍舉機影相嘅畢業生就算興奮到趷高腳，頭頂都未到佢心口呀！
港大嘅讚詞形容姚明無論球場內外都係巨星，平易近人，笑口常開，講到呢度本來神情嚴肅嘅巨人，都突然輕輕點頭抿嘴微笑，自然得台下一班畢業生同親友笑到卡卡聲。
之後姚明就俾貴為港大校監嘅狼振英「扑頭」，咁就變咗巨人博士。事後佢話感到好榮幸，有人問會唔會安排囡囡入讀港大？佢笑住答：「才兩歲啊！」