新民黨主席葉劉淑儀支持同志平權運動，旗幟鮮明。公務員出身的她，一向予人印象較保守。但她在本月初公開表態，聲援同志，贊成就立法保障不同性傾向人士的平等機會及基本權利展開公眾諮詢，亦大方聘請同志員工。她更笑言「年輕人好奇點解我咁開放，其實我十幾歲就讀女校，識同志嗰陣你哋都未出世」。
本月初，工黨何秀蘭在立法會動議就立法保障不同性傾向人士及基本權利作公眾諮詢，她毫無猶豫，投下贊成票。「我哋31票，可惜梁家騮議員返唔到嚟投贊成，都過唔到」。她認為立法會內的議員較保守，對動議存在誤解，「好多人將諮詢與同性婚姻畫上等號，好多人恐懼」，令動議未獲通過。
勿用宗教剝奪人權
葉劉淑儀認為，宗教團體的聲音左右議員投票意向。「明光社同浸信會表明反對，令議會好多同事都唔敢支持」。她認為議案是從基本人權角度出發，保障任何人得到平等機會及尊重，不宜用宗教理由奪去人的權利，甚至令同志受到欺凌。
「好多英國優秀嘅外交官、劇作家人才都係同志，我做保安科嘅時候，唔少英國嘅同志外交官想帶另一半嚟住，可惜我哋最多只可當佢另一半係遊客」。葉劉淑儀當時已同情這些個案，但基於本港不承認外國同志婚姻或公民結合的法定地位，無法如異性婚姻的伴侶般處理，簽發本港居留權。她只能建議這些官員的另一半按時出境，再辦入境手續。政制及內地事務局局長譚志源曾表示，社會對同志爭議仍存分歧，未宜公開討論。
批評政府避得就避
葉劉淑儀批評這是「斬腳趾避沙蟲」。「反性傾向歧視係今屆立法會開鑼以嚟，最具爭議嘅動議，政府唔想又燒着火頭，寧願收埋收埋」。「其實遲早都要傾，都要面對同志平權同婚姻，只係政府打算避得就避」。
葉劉淑儀認為，同性戀是一件平常不過的事，大方聘請同志員工。「我喺港英政府經驗、喺港大文學系、中學讀女校，都接觸好多同志，唔覺得有咩問題」。她的助手亦表示，他們工作環境是非常「LGBT friendly」，對任何性傾向人士都很包容。葉太指「好多男同志都細心溫柔，對女性嚟講係好好嘅朋友，我從來唔歧視佢哋」。