開始有些同情賓尼迪斯，雖然我對這位教頭冇乜好感，但觀乎上周他首戰領車仔對曼城，竟被球迷勁噓，要趕佢走的橫額大字報乜都齊，16分鐘還有全場鼓掌向前任領隊迪馬堤奧致意儀式；落面程度堪稱登峯造極！若我是肥賓，心中不禁暗罵：「大佬！我乜都未做過喎？」
其實一切未必是肥賓的錯，最衰迪馬堤奧！點解留低咁多美好回憶？97年，就是他身穿車仔16號球衣，在英足盃決賽一開波便抽入一球「世界波」，助球隊2：0贏米杜士堡，捧走球會當時27年來首個足總盃；半年前那個史上首座歐聯獎盃，更不用說了。
其實最錯又未必是迪馬堤奧，最衰阿巴莫域治！周街領隊，係都要搵之前帶利物浦同車仔成為世仇的肥賓執教！相信一眾憤怒車迷，最嬲並非他曾執教紅軍，而是他的悶波風格。由華倫西亞開始到利物浦，肥賓一直以4-5-1陣式獨步天下，靠的就是雙防中穩守，依賴兩翼側擊的單調進攻模式。看罷首戰對曼城後，球迷更大可「放心」，相信肥賓悶蛋足球勢將降臨史丹福橋。喂油王！你又話鍾意進攻足球？
諗深一層，最錯都是費蘭度托利斯！若非當年費托在肥賓的紅軍麾下如魚得水；若非費托現在狀態低迷，油王為何會搵肥賓返來激活他？現在激活費托未成，反而激親球迷。
以此思考模式，近日飽受僭建醜聞困擾的梁特首，大概也找到罪魁禍首：「最衰唐英年！唔係你當日輸畀我，我家使搞成咁？」
文：方柏翹
now足球評述員