雖然城電（1137）老闆王維基（魔童）出晒口術都未獲發免費電視牌照，但魔童一向輸人唔輸陣，攻勢排山倒海，最新出爐嘅城電年報變成電視台特刊咁款，詳盡介紹台前幕後工作人員，就連永遠唔知乜名嘅無綫綠葉或者真係唔知乜水嘅，都有相有名介紹，抵班員工咁撐佢。
城電年報個封面好有寓意，用個電視遙控將大海分開兩邊，魔童應該當咗自己係聖經故事裏面嘅摩西，要帶領成間公司，同埋被迫幾十年來睇來睇去都係嗰啲節目嘅觀眾過紅海！
城電仲打算下周二搞節目巡禮兼公佈新台名、台徽，總之都係你有你反對，佢有佢繼續做。
720人跟住搵食
其實都唔輪到魔童隨便放棄，年報話，城電已有超過500名幕後工作人員同220名藝員加盟，合共逾720個飯碗，點可以唔撐落去？當中大部份來自無綫，難怪無綫李寶安狂呻，舊年俾魔童喺創作部挖走一半人。
城電未開台，真係唔知佢啲節目抵唔抵讚，但多個台起碼令市民有多個選擇。家好多人唔睇電視，轉為上網揀全球各地電視台嘅節目睇，質素始終最重要，生霸死霸係冇用嘅。
李華華
mailto:[email protected]