「非常時期，要用非常的方法！」喺《寒戰》入面劉華同城城講呢句說話，成為套戲嘅其中一個主軸；英超打快車，也處非常時期，上輪大家鬥謹慎，入球率比前周大跌，今次部份剛失利強隊應冇得再留，重心博愛華頓「大」戰阿仙奴，以及利物浦破數據，作客熱刺開「讓球」下盤。
上輪以愛華頓末段被諾域治逼和較礙眼，如果唔係一早領先勒住，冇理由跌得番2分出嚟。今次招呼嘅係攻力更強、但上仗鬥維拉啞火唔輸偷笑嘅阿仙奴，主隊有費蘭尼復出，高空波好着數；不過近3季作客愛華頓全勝嘅阿仙奴又會出番禾仔同華美倫等主力，平手盤難估，不如博入球「大」兼攻兩邊3:2波膽！
次選，係本欄極少睇起嘅利記，今次作客熱刺獲受讓平/半低水，終見到利記退熱，值博率回來要多望兩眼；雖然紅軍近季被對手剋死，但呢隊波被看低反會醒神，今季3次作客獲莊家開出「讓球盤」，保持不敗，聯賽亦累計8不敗。熱刺上場用兩翼加里夫巴利同艾朗連儂速度爆贏韋斯咸中場，耗力後遇多生牯仔配合阿蘇打突擊嘅紅軍，唔易再有大甜頭。非常時期，押注非常利記，希望本月能逃出生天！
(下次見報日期：1/12)
文：蘋果波神