【有口話人】
曾任廉政專員的羅范，昨強指有人濫用司法程序達到政治目的，又埋怨現時「乜嘢都走去廉政公署度告」，影響廉署肅貪工作；但她未有進一步交代有關說法，是否不滿有政黨早前向廉署舉報行會成員林奮強，指他涉偷步賣樓案件。
暗批廉署立案查林奮強
羅范昨向樹仁學生談及本港優勢與隱憂時指，本港嚴謹的司法制度仍是優勢之一，但她話鋒一轉，突指現時「好多人可能借助司法程序，去達到一啲政治目標」，她續指，「家乜嘢都走去廉政公署度告，其實嗰啲係咪廉署嘅工作？啲同事如果用咗啲時間喺呢方面，又會唔會影響到佢哋打擊貪污呢？」與學生交流後，羅范再指，「我自己都知廉署啲同事做得幾辛苦，好多嘢佢哋都要處理，究竟嗰啲係咪真係屬於廉署範圍？」但她拒回應有關批評，是否針對廉署立案調查林奮強偷步賣樓事件，只是意有所指地稱，廉署要就林的舉報立案也是「冇辦法」，「佢（廉署）一定要㗎，因為有人投訴，廉署一定要立案，同埋唔能夠自己close file」。
事實上，今年特首選舉期間，梁振英競選辦核心與鄉事選委舉行江湖飯局曝光後，有份赴會的羅范主動以證人身份到廉署提供資料。
《蘋果》記者
羅范與學生對談語錄
•重提喬曉陽指普選必須要有均衡參與等條件
「（喬曉陽的前設下還能夠取消功能組別？）我唔知，呢個要大家討論一下，亦可以優化」
•免費電視牌照
「（政府處理發牌）用千幾日、其實係由佢（王維基）遞表第一日開始計，但其實你要講由通訊管理局去研究完，交畀政府係幾時，你知唔知？」
•傳媒責任
「乜嘢先叫傳媒社會責任？係咪揭黑就係社會責任？抑或抹黑係社會責任？抑或係作古仔、娛樂讀者係社會責任？」
•長者生活津貼
「（資產審查水平）可以探討，但我唔係好贊成我哋為咗追求完美，就去拖慢咗應該做嘅好事，如果你唔做全民退休保障我就唔過你，咁樣一跳跳到好遠」