如果話唐唐嘅捍衞核心價值係年度金句，咁就真係太睇少狼振英喇。佢前日回應佢個200呎消失的密室時話「僭建處理咗，僭建就唔再存在」，套用無端被炒魷嘅ATV靚女主播胡燕泳嘅說話，真係「讓我看儍了眼」。網民即時將呢句「___處理咗，___就唔存在」變成萬能key，總之你日後做咗錯事，都不妨key呢句金句自辯。
網上瘋傳新句式
網民噚日瘋狂造句，因為梁振英呢句「處理咗，唔存在」實在太神奇。網民話，套用狼英嘅邏輯，只要任何人有僭建，封咗佢就乜事都冇，唔使拆㗎，因為狼振英都係咁做。相信最開心都係鄉事派，因為日後政府追究村屋僭建，村民只要用磚頭填咗佢，即使僭到摩天大廈咁高，狼振英都吹你唔脹。
網民更加即時將呢句變成萬能key，總之key啲犯法嘅事上去，都可以將罪行「合法化」；舉個例，有網民就話，如果將啲貪污番嚟嘅黑錢「處理咗」，貪污就唔存在。有網民就仲大膽，話中央鎮壓咗六四，六四都唔再存在，呢個邏輯共產黨最啱聽。
未來兩個月就係交稅嘅日子喇，如果閣下過咗deadline仲未交，唔使驚，因為只要你搵日交番少少，「處理咗」，咁遲交稅就「唔存在」！八方就話，當你試過呢個萬能key，「處理咗」，個萬能key就唔存在㗎啦！
網民有say
貪污嘅錢洗咗，受賄就唔存在
六四鎮壓了，六四便唔存在
殺完人處理了屍體，兇案就唔存在
姦完再幫人着返衫，強姦就唔存在
mailto:[email protected]