「僭建處理咗，個僭建就唔存在。」狼英為佢「消失的密室」狡辯時，講出呢句似曾相識嘅說話。同佢嘅多年摰友、第一任特首董建華指「八萬五」唔講即係唔存在，口脗一模一樣，果然係Friend，難怪兩個嘅施政都係一擔擔。
金管局噚日收市後再接錢31億銀，普遍解釋為人保（1339）招股嘅資金需求，未必能刺激大市。唐牛就覺得，熱錢入咗嚟就冇咁易走，資金隨時會換馬其他股份，依然利好股市，點睇都係好消息。
近期內房股強到無倫，唔少都創52周甚至歷史新高，代理股合富輝煌（733）默默起革命，噚日突破今年高位。除咗板塊炒風旺盛外，金手指增持亦成為催化劑，惠理基金喺11月初連環增持近6球貨，增持均價介乎2.22至2.28元，持股量去到6.03%，觀乎近期強勁走勢，唔排除掃貨行動未完。睇圖表，合富月初至今造出兜底走勢，成交亦配合升勢，以近期強股越強嘅玩法，炒上3蚊並非難事。
唐牛