【本報訊】同樣克服最低工資及食材成本上升等問題，大快活（052）中期盈利與大家樂（341）一樣重拾雙位數增長，惟其控制成本手法卻更為出色，中期業績毛利率達14.5%，高過大家樂約2個百分點。集團上半年成本雖控制得宜，但行政總裁陳志成認為食材價格仍高企，下半年有加價壓力。記者：陳新政
陳志成昨日表示，「其實上半年公司加價少過1%，但食材成本升咗唔少，好似之前墨西哥禽流感，搞到有錢都買唔到貨，雞蛋（價錢）又升40%，如果存貨唔夠用，都要去炒現貨。如果我哋乜都唔做，利潤率會跌0.5個百分點，由6.6%變成6.1%，所以下半年係有加價壓力。」集團上半年平均價單為30.5元，較去年同期的29.5元上升3.39%。
靈活調更 唔怕最低工資
陳志成續稱，透過中央廚房、靈活編排員工更表及工時，已抵銷最低工資所帶來的成本壓力，他認為即使將最低工資加至30元，亦不會再有太大影響。
他說：「加咗最低工資，都只係有18%至20%員工要加薪，如果政府要咁做，我哋會同意。」
大快活半年新增香港門店數目為7間，但員工人數卻保持不變，仍為4600人，工資成本亦只上升7%至約1.9億元，助毛利率由13.7%升至14.5%，較競爭對手大家樂還要高。不過由於食材成本持續上升，陳志成認為下半年情況會較為審慎及困難，集團會減慢開店步伐，「香港只會再開一至兩間，內地就唔急住再開。」
證券界：前景仍遜大家樂
大快活及大家樂兩家連鎖食肆均顯示出有能力在逆市中駕馭成本，若果要投資，選那一家較好呢？AMTD證券及財富管理業務部總經理鄧聲興認為，大快活及大家樂在控制成本方面雖同樣出色，但他較看好大家樂，主要是規模效益的考慮。
他說：「睇到兩間毛利率都有改善，雖然從員工人數去計，大快活控制成本好過大家樂，不過如果計規模同財力，大家樂前景會比較好。好似大家樂旗下有意粉屋，平均消費會高啲，而且喺擴充業務方面睇，大家樂開多一至兩間店，就算生意唔好，都可以靠整體較大嘅營業額去支撐，但大快活分店數目少，如果夾硬開多一至兩間店，生意差就會拖低晒個營業額。」