港澳辦前主任魯平早前出言恐嚇，指香港人不愛當中國人，大可放棄中國國籍，原來現實生活當中真有人對這屆政府失望已極，打算移民他國，今生不做中國人。
坊間傳聞好些歐洲國家承認BNO持有人是歐洲公民，有個八十後把心一橫，掏出1,600元，補領了過期十年的BNO護照，準備移居歐洲。BNO「升呢」未知真偽，但投資移民越見便宜，若左派及政府繼續趕客，搞不好觸發香港新一輪移民潮。撰文：陳勝藍 攝影：胡堅
打算赴歐 23條立法一定走
Philip向來不理政治，直至梁振英上場，才驚覺「暴秦」迫在眉睫，他說：「上一屆政府可能只係唔做便唔會錯，但呢屆政府喺短短一兩個月嘅時間想做好多嘢，而呢啲嘢都令我反感，令我覺得前途有危機。」
他舉例如新界東北割地賣港，「東北包裝到好靚，政府啲語言偽術講係供應一個地區畀某某人使用，而唔係深港融合，但係我個人覺得完全係將香港同大陸嘅邊界模糊化，令我有啲恐懼，因為我一向都唔鍾意中國大陸嘅生活模式、思想模式」。
「政府恐嚇人民」
Philip在理大設計學院畢業，現在從事藝術教育，上一任政府將西九包裝為文娛中心地區，他寄以厚望，友人甚至報讀設計管理、藝術管理等文憑課程，以備他朝派上用場大展拳腳，「奈何梁振英上場後完全無再提，亦完全無時間表，我好失望」。
早前有市民高舉港英旗，高官及左派喊打喊殺。「我expect（期望）政府愛護人民，而唔係恐嚇人民，家係恐嚇形式，我係咪仲要留喺香港？世界咁大，我唔一定要留喺香港嘛，所以我諗移民會唔會係一個出路呢？」
他唸書時曾當交換生到英國Coventry University，順道暢遊附近多國，發現歐洲重視藝術工作，可度餘生。今年初遊法國，持BNO在歐盟窗口入境，竟然毋須蓋印，等於沒有逗留期限。他上網搜集資料，發現有不少歐洲國家承認BNO持有人是歐洲公民的例子。「我有個朋友拿住呢本BNO去法國搵學校，成功搵到學校，暑假仲可以入政府做暑期工，都是靠這本護照！」
Philip自言隨時撤退，廿三條一旦立法更要即走。「你已經冇幫我哋這個藝術行業，仲要搞廿三條，可能第時我講句嘢都會俾人拉，連畫支英國旗都可能有問題。如果他們真係立法，我一定走！」
申請台籍 想在文明環境生活
三十三歲的Alex不談政治，只講民生，他最看不過眼強國人在港的所作所為，打算遠走台灣。他說：「近幾年香港環境大家都睇得到，唔好講呢一任政府定係上一任，大趨勢係俾大陸牽住鼻子走，有乜嘢事就開放自由行，放人落嚟，零售市道好似好啲，但之後生活越嚟越艱難。」
內地暴富搶高樓價
Alex與妻子育有一女，家住四百多呎單位，想換大屋，無奈內地暴富來港搶高樓價。「家太古城，六百幾呎，要成七百幾八百萬元，這不是普通人有能力賺到的錢，監粗上咗車，要慳吃慳用，想買多件玩具畀BB都唔得，咁辛苦唔知為乜！」
Alex是皇仁、理大畢業生，經營零售鑽石，辦公室設在內地客必到的銅鑼灣，見盡醜態，「起碼自由行未開放之前，我睇唔到好多人隨地吐痰，煙頭滿地，喺港鐵車廂入面大大聲講嘢，我感受到生活環境唔同咗」。Alex所求不多，只望女兒在文明環境長大，「起碼面前唔會有個叔叔『咳吐』，你點教佢（女兒）？你話唔好，但佢見到好多人咁做喎！」
投資130萬移民台灣
寶島在華人社會中算是烏托邦。「台灣社會起碼叫做文明，唔似大陸人揸車撞到你，碌多兩下撞死埋你！」近日寶島向港澳人士推出移民計劃，只要將五百萬台幣（約一百三十萬港元）滙入台灣銀行或投資當地，即可申請居留權，一人申請，配偶及未成年子女都受惠。
Alex正準備申請，「你用五百萬去投資，例如買層樓，反正你都要住嘛，只是百多萬港紙，喺台灣（例如新北市）可以買到五百、六百呎，比起香港樓好好多！」但台灣的累進稅制，稅率由6%至40%，平均比香港最高的15%為高。
冰島德國容許BNO持有人居留
記者致函歐洲多國移民局及駐港領事館，芬蘭、挪威、瑞典、冰島領事館均回覆指BNO持有人不是歐盟公民，無權居留，然而冰島移民局、德國聯邦移民及難民局並無斟酌BNO是否等同英籍或歐盟，容許持有人居留、找工作及正式申請成為公民。
此外，2009年英國修改國籍法，容許沒有國籍的BNO持有人申請正式的英國護照，而根據香港政府網頁，中國公民有權申請退出中國國籍。記者向英國駐港總領事館求證，對方只提供英國國境局網址，記者再致函國境局，未見回覆。
近期投資移民計劃
台灣：將130萬港元以上滙入台灣銀行或投資當地可申請居留權
匈牙利：購買250萬港元以上國債可申請入籍歐盟
西班牙：購買160萬港元以上物業可申請居留權