去到11月尾，港股出現忽蟲忽龍嘅走勢，噚日A股滬綜指又跌穿2000關，拖累港股倒跌收市，資金又去番啲穩陣嘢泊岸。就咁睇，家嘅環境同2010年12月非常似。
回顧2010年，熱炒QE2之後嘅12月，變得頗為難炒，股市陰晴不定，但係當時並非冇股跑出，當中最亮眼嗰隻叫做數碼通（315）。
當年數碼通做乜會出現Re-rate？第一，當然係蘋果iPhone刺激上客，令電訊行業轉旺；第二，就係炒高息股，派息率百分百嘅數碼通，千禧年至今股息率最低都有3厘，藉Re-rate炒到癲，單計2010年12月就升咗24.6%，2011年1月再升40.7%，成為當時嘅股王。
睇番家，既然情況有相似之處，資金再搵穩陣高息股炒上，近期走勢最好嘅領匯（823）升到天價，大家睇住10年期香港政府債券的孳息率3厘去炒，已經到咗價，再搵下一批股份接力嘅話，相信收租股走唔甩。
合和資產折讓大
收租股近日有陸續破位嘅迹象，會德豐（020）噚日升3.2%、九龍倉（004）升1.7%，晉佳嘅愛股合和實業（054）亦挑戰新高，噚日升1.8%至30.45元。
近期點石成金嘅瑞信，早喺10月份已出報告唱好合和，預測每股資產淨值去到50.60元，即係現價相對NAV折讓四成，至於目標價就去到38.20元。一句講晒，現價仲唔算貴。
合和出年年初有利東街項目出售，收租物業有合和中心一、二期，比希慎興業（014）同鷹君（041），更有重組租戶組合嘅空間，租金上升潛力更大，因此論牌面，合和應該係最好嘅收租股選擇之一。睇番合和歷史股息率4.5厘，遠高過希慎、鷹君同埋領滙，估值有上升空間。
如果閣下驚合和近半年升得太多，有啲畏高嘅話，其實揀番希慎、鷹君都冇壞。睇番希慎先啱啱破位，鷹君都似似哋想突破25蚊，睇嚟都會跟住破頂，似乎買嚟喺12月持有，到時應該有糊食。
晉佳
本欄逢周一、三及五刊出