人稱「新界王」嘅劉皇發出掌鄉議局幾十年，年屆76歲嘅佢話到明要退落嚟，唔再競逐連任主席，留多啲時間陪吓屋企人。雖然仲有成兩年先改選，不過家新界事務單單惹火，又僭建、又新界東北發展，要搵個鎮得住場，又肯拋個身出嚟處理一大堆燙手山芋嘅接班人真係唔易㗎；傳位嘅問題，搞到「劉皇叔」好頭痕。
人言可畏 長子唔接手
鄉議局最正路當然係搵副主席接班啦，勝在做開領導層，熟知鄉議局運作同事務。不過發叔就呻，家新界環境複雜咗好多，副主席張學明都唔多肯接手，咁另一副主席林偉強呢？發叔就笑而不語。咁兒子劉業強又得唔得呢？發叔即時耍手擰頭，笑言阿仔能力同人緣都唔錯，之但係人言可畏，「咁咪俾人話家天下囉，佢唔敢㗎！」
一係唔肯做，一係唔敢做，發叔就話唔使咁愁，因為鄉議局仲有好多人才。咁成日同佢打對台嘅前律師會主席何君堯，係咪適合嘅人選呢？發叔就話，鄉議局仲有上百個律師，而且其他專業人士多不勝數，點會搵唔到人﹖老人家點睇，都好清楚啦。
「首要條件係受得氣」
到底做鄉議局主席要具備咩條件﹖發叔笑言：「首要條件係受得氣！」咁又係，好似申報僭建咁，發叔一面要同政府周旋，一面要安撫新界人，搞到兩面不是人，仲要俾人踩場話佢無能，真係EQ低啲都搞唔掂；第二個條件係家底夠厚，如果仲要為口奔馳，邊有時間搞好鄉事，發叔自爆不時要自掏腰包捐畀鄉議局，好似菜園村收地安置居民，佢都出咗唔少喎。
除咗上述兩點之外，發叔話做得主席一定要夠熱心，而且人緣要好，咁先至有人畀面，做起事來自己事半功倍啦。不過八方好質疑，鄉議局有邊位高人符合上述條件囉。
mailto:[email protected]