全城最近掀起一陣《寒戰》熱，八方聽聞，連ICAC高層都俾呢套電影吸引住，覺得套電影拍得好有劇力。老廉最近開始籌備緊《廉政行動2014》，據聞都諗緊係咪要誠邀《寒戰》兩位導演陸劍青、梁樂民幫忙拍番集。
《廉政行動2014》加強真實感
《廉政行動》每隔兩、三年就會拍一次，用真實個案提醒觀眾貪污嘅惡果，據聞下一套《廉政行動》會搞搞新意思，由過往每集約45分鐘加長到1小時30分鐘，會用電視電影形式出街，同埋會參考電影《飛虎》系列，真實感強好多。
除咗睇中《寒戰》班底，據聞廉署都想搵林超賢、泰迪羅賓等人執導，上次拍《廉政行動2011》，林超賢嘅作品就攞咗芝加哥國際電視節銀獎。2014年就係廉署40歲生日，佢哋話會搞吓微電影創作比賽，吸引吓年輕人關心反貪問題。