車路士首次由賓尼迪斯領軍，喺周日英超主場迎戰曼城0:0和局收場，見到誓神劈願話要重振雄風嘅費蘭度托利斯（費托）依然死氣沉沉，反而場邊車仔球迷啲搞作仲好睇，新帥第一場波就俾主場球迷叫落台，情況就好似我哋特首咁。不過賓帥都算係高EQ，無視種種壓力，賽後冇表露到唔開心嘅心情，話唔想佢教車仔嘅，都只係「一兩個」球迷啫。
費托繼續啞火
相信唔少球迷都覺得，前任主帥迪馬堤奧只係代罪羔羊，班主阿巴莫域治竟然搵曾經教過利物浦嘅賓尼迪斯嚟接任，難怪佢哋咁唔高興。對曼城呢場波，賽前先為喺上周六過身嘅前領隊索斯頓默哀，球迷都好識做默哀過後先搞事，拎晒啲「我哋唔想你嚟」同埋「Rafa滾蛋」等標語出嚟。
要球迷收聲，最佳方法就係贏波；賽前講到費托同賓帥重逢會如何重新燃起射門之火，到場上咪又係依然咁頹，對住紮住上陣嘅高柏尼完全冇板斧，得下半場有一次射門機會，係有火，不過係啞火囉。
成場波俾球迷柴台，兼好唔畀面咁一路唱歌歌頌迪馬堤奧，賓帥賽後回應話：「以我過往喺英格蘭執教嘅經驗，係我一路都唔知道啲球迷喺台上唱緊乜。至於啲橫額，其實只要一個人就已經整到出嚟，或者要加多個先可以喺場邊舉起佢。」講起「契仔」費托繼續冇波入，賓尼迪斯亦都好無奈：「大家可以見到佢一直都好積極爭取入球，成隊波會繼續努力咁幫佢製造入波機會。」
賓帥同車路士份約只係到季尾，雖然係人都知阿巴搵佢都係攝吓期，但有時事實又唔使咁白紙黑字寫得咁清楚嘅。場波嘅官方比賽紀錄文件度，寫住賓尼迪斯嘅名銜係「Interim First-Team Manager（暫代領隊）」個個都唔鍾意佢，都咪話唔冇癮。