新世界發展（017）創辦人鄭裕彤入院超過兩個月，一舉一動依然係市場焦點，好似最近蝕沽銀基（886）就成為中環talking point。原來彤叔9月中入院後，佢女婿杜惠愷同外孫杜家駒亦密密沽出同系嘅新創建（659），其中杜家駒手法高明程度，絕對拍得住阿公。
兩個月套現3808萬
點解話彤叔外孫係高手？事關新創建出名交投疏落，近半年日均成交額只得千零萬，大手出貨有一定難度；根據聯交所資料顯示，杜家駒喺9月27日至10月4日連續四個交易日沽出新創建，其中兩日分別狂掟50萬股，佔當日成交超過一成，但最高沽貨價竟然係12.88元，較新創建近8個月收市高位12.8元仲要貴，令包括華華在內嘅老散甘拜下風。
佢阿爸杜惠愷就「密沽當三番」，喺9月28日至11月22日期間，有超過一半交易日都喺度出貨，但好多時都係幾萬幾萬咁沽。兩父子不足兩個月時間，合共沽咗311.3萬股新創建，合共套現3808萬。杜惠愷仲揸住市值1.45億嘅新創建，阿仔批貨就得番655萬元，要沽嘅話，易過阿爸好多。
唔知彤叔知道孫仔操盤咁叻後，第時會唔會搵佢幫手出貨呢？
李華華
mailto:[email protected]