挪威有北海石油，積累財富太多，因國家人口少，只有五百萬人，錢多到使唔晒，但北海油田有時而盡，故此挪威老早成立一個石油基金，後來在2006年將啲錢全部注落Government Pension Fund Global，已積累到三萬七千億挪威克朗（截至2012年九月）約等於六千五百四十億美元，相當於每個挪威人擁有十三萬美元，而且繼續增長，你話挪威人係唔係一世無憂呢。
挪威人善於利用北海油田帶來嘅財富，計劃未來，成為歐洲最大股票市場投資者，想窮都幾難。澳門現在人口少，賭場稅收多，理應向挪威學習，將用唔去嘅賭稅成立一個澳門長俸基金，請挪威專家幫吓手咪得囉！
會計M有澳門出世紙與小學紀錄，攞番張澳門身份證並不困難，以後澳門派錢佢有份，香港派錢佢有份，可以津貼吓佢在加州嘅大筆稅款。會計M由澳門而香港而美國，由一家住板間房，七口一張床至觀塘徙置區至三藩市灣區三千六百呎大屋，全憑一個會計師資格。講起嚟，會計M感激香港嘅教育制度，中學教育有根基，初級會計讀得好，打好紮實基礎，由LCC初級、中級至高級證書至ACCA資格，一步一步向上升，無花無假，貨真價實。今日會計M在一間美國高科技公司主持公司財務及會計，手下有不少大學生、碩士生，佢地諗唔到一位香港中學生竟有如此資歷。分別在那裏？點解會計M唔怕俾美國新浪推倒香港舊浪？會計M話：「我睇美國基礎教育根基不穩，啲大學生讀會計，考試全部用選擇題，大學碩士都係，死啦，會計學生點可以唔考埋數嘅唧，因選科太自由，學生選晒啲容易pass科目，嚟我公司見工，我俾啲資料叫佢地埋一盤數，做張P&L（損益表），全部做唔掂，再考balance sheet（資產負債表），更加一嚿雲，會計學碩士咯喎，不如我地在中學考到LCC中級試。嗱，香港會計學生如果想留在美國打工，好易㗎咋，到美國搵間大學讀番個會計學碩士，畢業後搵工唔難，公司代安排工作簽證㖭。唔知點解美國年青人讀會計，好多時如拉牛上樹，我請助手都好唔容易㗎！」