趙世曾唔認式芝另一半

【銅鑼灣】現年76歲嘅趙世曾，近日又有新女上場，佢前晚又同新女友去咗銅鑼灣開餐，佢哋入咗名店坊嘅食街食西餐，其間趙世曾好有風度，成日幫女友分餸菜，食飯時兩個人有講有笑不知幾溫馨。餐飯食咗30分鐘，埋單時趙世曾有啲狼狽，因為地方暗，要女友用手機做電筒幫佢照住，至簽到信用卡張單。

趙式芝（右）日前同楊如芯補搞結婚派對。
資料圖片

趙世曾女友想用雜誌遮面，但始終俾記者影到。

「嗰個人唔識」

趙世曾同女友步出餐廳時，女友一見到記者影相，就好慌張咁用本雜誌遮面。趙世曾就同記者有傾有講，講到佢冇去囡囡趙式芝嘅結婚party時，佢似乎仲未接受到個女同同性嘅楊如芯結婚，佢話：「佢哋開party我上去做乜呢？式芝嘅性取向點樣只有佢知道，我都唔知㗎。」問有冇同囡囡見面，趙世曾話日日都有，但就依然死口話唔識囡囡嘅另一半，佢話：「日日都有同佢（趙式芝）見面㗎，嗰個人唔識喎，冇見過佢。」講完跟住就上咗車走。
採訪、攝影：徐錦池、吳耀輝

趙世曾同女友上車後，女友一直用雜誌遮面。

趙世曾食飯時好照顧女友。