【本報訊】曾大呼最低工資將拖垮集團盈利、甚至乎業績會「見紅」的大家樂（341），結果只是捱了一年多時間，盈利便重拾升軌，其行政總裁羅開光更揚言，就算未來最低工資由28元加至30元，「我哋都唔會憂慮」。這邊廂解決了最低工資的影響，承諾「做足100分」的大家樂昨日已急不及待表明會逆市繼續加價，相關消息刺激股價升近2%。記者：陳新政 陳健文
羅開光昨在記者會上說：「經過呢年幾嘅經驗，我發現就咁將成本轉嫁畀消費者係冇用嘅，我哋諗到解決（最低工資）方法，就係靠推出新款特色產品，仲要係日日出，唔係靠promotion，好似『牛more王焗飯』咁，出咗之後翻枱率同消費額都明顯增加咗。」
推貴價新食品增收入
羅開光續稱，不會憂慮最低工資由28元加至30元，因為加幅只會較現時再高約7%，會透過新產品來提高消費金額。他透露，下半年度個別產品將加價0.5至1元不等。按其平均單價30至31元推算，即加幅約1.6至3.2%。
首席財務官林洪進補充指，集團現時平均食物價單為30至31元，按年增加了1至2元，加幅為3.34%至6.45%。資料顯示，屬「特色新產品」的牛more王焗飯於午市的售價為36元，較31元的「一哥焗豬扒飯」，貴約16.1%。
除了變相加價外，羅開光亦指集團是透過控制成本保盈利增長。他說：「人工成本只係升咗8個巴仙，係符合公司預期嘅，不過因為市場競爭令人員流失，我哋人手依然短缺，加重咗員工的工作負擔，我哋要請多800至1000人才符合正常水平。」
兼職員工佔50% 慳成本
大家樂截至9月底半年員工人數僅增加600人至16600人，但兼職員工卻佔五成，間接減輕部份工資成本，集團半年工資成本按年上升8.34%至8.16億，較去年勁升17%大幅回落。
康宏証券投資及資產管理董事黃敏碩指大家樂業績，有令人煥然一新的感覺。他說：「原本以為最低工資同埋租金嘅影響，會繼續困擾業績，但由於集團控制得宜，上半年好似僱員成本都只係升咗大約8%，租金更只係升咗6%，好意外。」
他續稱：「喺上次金融海嘯，已證實咗好似大家樂呢類低檔消費股可以受惠，所以家香港經濟增長開始放慢，再加埋佢（大家樂）仲講到明會繼續加價，我睇好大家樂盈利可以繼續增長……珠寶股就唔好掂喇，佢哋個下降周期先啱啱開始。」
有外資分析員則表示，同樣是快餐類食肆，翠華（1314）應不能受惠於香港經濟增長放慢。他說：「翠華唔受惠嘅原因好簡單，係因為佢哋貴，若果因為經濟差而要節衣縮食，去翠華食嘢應該唔係首選，佢啲舖仲要大部份都集中喺啲貴租地方……若果香港經濟唔出現一個似樣嘅反彈，千萬唔好買翠華。」
受業績優於預期消息刺激，中午公佈業績的大家樂，午後曾逆市抽升約2%，最後收報22.9元，升1.1%或0.25元。
市民斥樣樣貴 加價都硬食
李先生：
「大家樂梗係貴啦，所以食下午茶，印象最深係粟米肉粒飯，今年加咗幾蚊，如果再加價會食少啲。」
程小姐：
「成日食大家樂早餐，加價都可以接受，但希望有同員工分享盈利嘅成果。喺尖沙嘴樣樣都貴，所以我都會繼續食佢。」
