貴價茶餐廳翠華（1314）噚日成功上市，大股東李遠康持有逾28%股份市值9.7億，斷估23年前佢決定同啪拿買起新蒲崗翠華時，都冇諗過自己有日差啲變成十億富豪！
前拍檔兼創辦人撐場
李遠康身家暴漲冇話待薄員工，有營業獎金唔在講，翠華近日登求職廣告，福利一欄竟然仲有「子女書簿津貼」，以茶餐廳來講，有咁嘅福利算係異數。但唔知翠華上市後，遲啲會唔會為咗向股東交代，整靚盤數，逐步削減員工福利呢？
李遠康當年向創辦人蔡創波買入翠華而發達，波叔後來開番間裝修同翠華有99%相似嘅康年餐廳，佢噚日都有出席上市儀式，替李遠康高興埋一份，但有冇畀錢認購翠華股份呢，佢就唔肯講，定係買咗好多費事俾人計身家呢？