禮義廉鍾樹根豪花163萬參加今屆立法會選舉，原來兩成開支都係上貢咗畀禮義廉前副主席程介南。最新嘅選舉開支披露，Tree根為咗呢次選舉請咗程介南做佢嘅公關顧問，程介南都算狼死，埋單計數收咗Tree根34萬。
拍宣傳片收3.5萬
34萬蚊包括立法會選舉策略顧問服務費18萬、選舉口號文字宣傳8萬、競選論壇準備及訓練4萬、宣傳片拍攝製作3.5萬、宣傳相片拍攝都收咗5,000蚊，有巧立名目之嫌喎。
由於禮義廉候選人都係由個黨畀錢選舉，就係咁，程介南就咁掠咗禮義廉34萬。使咗咁多錢，Tree根除咗贏咗個議席外，公關形象唔見有咩改善，見佢喺立法會嘅低劣水平就知啦。
由於庫房會資助候選人嘅競選開支，每票就資助12蚊；按比例計算，程介南袋入面嘅34萬，8.5萬係來自公帑。程介南仲食兩家茶禮，除咗幫Tree根之外，佢仲幫扮中立嘅法律界何君堯，收咗對方2萬蚊；換句話講，程介南喺今次選舉最少賺咗36萬。
至於鼠王芬嘅金曲《快樂西九》，天天高唱「美芬加油、堅守西九、用愛打造、快樂西九」，就係咁盛惠3,500蚊，之後仲拍埋MV，用咗5,000蚊，一曲《快樂西九》，埋單計數要成8,500蚊！