歐洲經濟持續低迷，各地方勢力也人心思變，繼蘇格蘭決定喺2014年秋季舉行公投，表態是否留喺英國；西班牙加泰隆尼亞省周日也完成地區選舉，不過支持獨立嘅候選人竟然大敗，或者當地球迷，真係擔心，如果加泰隆尼亞獨立後，班霸巴塞隆拿會如巴塞市長建議，轉向法甲聯賽競逐。
其實地理位置都幾影響球隊嘅發展；位於英格蘭中部嘅維拉，經濟實力自然及不上首都圈球隊車路士、阿仙奴，以及西北工業區的曼聯、曼城、利物浦等；雖然維拉享有光榮歷史，加上美輪美奐嘅維拉公園主場，但都阻止唔到呢幾年護級戰命運。
上周六維拉能夠賽和阿仙奴，搶得1分；事實上說搶，平心而論，係阿仙奴喺維拉身上搶1分才較恰當。或者一般預期，維拉今季英超席位難保，開季至今也只曾兩勝，甚至連陣中最具威脅的前鋒戴倫賓特，也因與領隊林拔鬧僵而被棄用。
不過一如帶諾域治升班，林拔組建維拉都冇靠大牌球員，前鋒三劍俠中，賓迪基同樣係比利時國腳，但喺英超風頭及不上夏薩特、費蘭尼及華美倫等同胞，但唔代表他實力不如人，當然年僅21歲，把握力仍有待改善，不過爆炸力同彈力幾勁。而由前領隊奧尼爾領軍開始，艾邦拉荷已漸改為翼鋒，同安祖斯韋文左右齊飛，威力唔錯，中後場亦都逐步換血，班倫、施亞蘭奇勒呢班89年出生球員，已經成為主力，艾殊利韋斯活特、安祖斯韋文更加係90後。
或者維拉真係不幸降班，但如果保持呢個班底，落到英冠一樣可以呼風喚雨，唔怕冇升班機會。
文：牽牛