上星期先以黑石大中華區主席身份叫大家唔好買香港樓嘅梁錦松，係咪想轉工？定係撈多份兼職？內地網站新浪財經噚日爆料，話招商局集團下月成立招商局資本，搞另類投資，搵到梁錦松幫手去「操作平台」。
200億人仔等發揮
據聞，招商局集團見旗下子公司各有各搞投資業務，唔夠效益，於是將所有投資公司歸一兼搞大佢。新浪話招商局資本已募集200億人仔，國內營運總部喺深圳，國際營運總部就喺香港。
大旗手當然係集團董事長傅育寧，負責操作平台嘅包括阿松、摩通特殊機會投資集團中國區前總裁張天偉、高盛亞洲房產組前負責人彭申、瑞信固定收益部中國房產融資部前負責人陳軍余等。
另類投資即係股債、貨幣同基金以外嘅金融或實物資產投資，近年股市難搵食，反而亞洲樓市升唔停，難怪招商局睇中呢個市場。黑石搞另類投資出晒名，搵阿松幫手亦好啱數，但唔知係咪全職？