徐淑敏老公黃浩經營的食肆被爆有藝人吸毒，店中閉路電視拍下有關片段，黃浩直認警方已聯絡要求交出證據。與此同時，曾是熟客的徐濠縈前日忽然在網站貼上黃浩的照片，陳冠希和李璨琛老婆梁志瑩留言鬧爆，黃浩的底線被踩，他昨不忿說：「做錯嘢嘅人仲諸多事實。」
徐濠縈前日在社交網站Instagram貼了徐淑敏老公黃浩的大頭相，李璨琛老婆梁志瑩留言鬧爆黃浩說：「職業：傷人，嗜好：博見報，副業：做人渣中之敗類。」經陳冠希轉貼再揶揄一句「PK」，火上加油下，黃浩不甘被誹謗，決意對簿公堂，琛嫂的Instagram昨日即把自己頭像換了一隻腳。
電話紀錄交律師
黃浩前日表示若人身安全受威脅，昨日會報警求助，他昨日即聯絡了律師商討有關細節，黃浩昨日在電話中說：「我同律師商量咗單case交畀佢哋處理，律師話要準備證據，甚至乎人證，同以前嘅電話紀錄要交畀佢。無端端辣着啲小人，我不如交畀專業人士處理。」
黃浩誓要討回公道，他餘怒未消說：「我要攞番公義，我冇做錯嘢，反而做錯嘢嘅人仲諸多事實。」有關人等可有再託第三者來調解，黃浩說：「我今日喺律師度唔開得電話，有好多留言，暫時仲未聽到。」
有指黃浩的食肆閉路電視拍下廂房中有藝人吸毒的片段，警方已聯絡他要求交出作證據，他說：「警方係有聯絡過我，但內容同要求就唔方便透露。」黃浩的是非有否令太太徐淑敏擔心？他說：「我叫佢唔好擔心，亦唔好理，我嘗試大事化小，對方唔肯，仲將攻擊提升，我冇氣再去拗撬，交晒畀律師處理。」
採訪：丁寧