資料顯示，舊年香港平均每日失竊近廿部手機，以家差唔多人人一部智能手機來睇，唔見嘅應該都係呢類。其實唔見幾千蚊部電話事小，裏面聯絡資料或相片唔見晒先大件事。有電訊商就同加拿大流動通訊風險管理公司Fixmo合作推出新服務，如果用戶唔見咗部智能手機，可以透過網頁追蹤手機位置，遙控部手機發出警號，兼且啟動相機功能，影低揸住部手機嘅人個樣同附近環境；仲可以遙距為部手機加密同洗晒裏面嘅資料，最啱鍾意玩自拍嘅人用；功能厲害成咁，真係同占士邦嘅「架生」有得揮。好似話美國國家安全局都有用Fixmo嘅服務喎。