車位炒風越颳越烈，月租仲貴過深水埗劏房，以4200蚊計，回報率僅4厘，卻要承受需求波動及地理環境限制風險，絕對博唔過。上述情況除反映資金氾濫，更突顯香港貧富懸殊問題非常嚴重──車位竟然貴過床位，有錢人養車等同包起窮人住宿，特膠政府仝人難辭其咎。
港股喺一片看好聲中反高潮下跌，不過升跌股份比例47:53，反映跌市下仍有唔少股份錄得升幅，噚日推介嘅豪特保健（6880）逆市漲11%，成交強勁，相信升勢未完。
今日推介家具股敏華控股（1999），截至9月底半年賺2.2億銀，按年增長54%，符合盈喜要求，毛利率擴闊1.1個百分點至35.7%，主要受惠原料價跌及產品加價，預計下半年仍有上升空間。業績公佈後敏華最多升25%，現價年度化市盈率及息率分別為12倍及3.5厘，以增長股計絕對唔貴，戰友可候股價回試5.60元吸納，中線突破今年高位6.40元應冇難度。
唐牛