咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
上星期講曼聯嘅反勝魔咒係活力，今輪佢哋喺落後下換入路爾斯安達臣同查維亞靴南迪斯，調走老將，即刻又再次反勝，睇嚟費格遜唔係唔記得呢個反勝魔咒，只係上輪對諾域治一時醒唔起啫！
今日其實想講吓車路士兩翼防守嘅問題。佢哋今季買咗夏薩特同奧斯卡杜斯山度士返嚟，加埋上季加盟嘅桑馬達，呢個年輕有活力嘅中場組合認真令人嚮往，但佢哋3個踢法好似，鍾意走入中路同埋唔鍾意防守，如果佢哋出齊，車仔嘅兩翼防守就會非常薄弱，閘位球員經常要面對一至兩名對方嘅攻擊球員，結果邊線成為防守漏洞；上輪西布朗就係針對呢點，大玩兩翼傳中，搞掂咗車仔。
周日對曼城，車仔續出3核，邊線再成為曼城攻擊嘅重點。喺呢場比賽，曼城僅有19%攻勢來自中路，但有47%喺右路，34%喺左路。除咗大衛施華活躍，曼城兩閘高拉洛夫同薩巴列達都頻頻助攻，其中前者85次觸球，幾乎係全隊最多，同埋佢全場11次傳中，狂轟入車仔禁區；右邊嘅薩巴列達除咗出波，仲有次射門㖭。
睇番車仔右閘新仔艾斯派古達嘅數據，就知佢疲於奔命，全場92觸球，為全場最多嘅球員，並造出兩隊最多嘅6次鏟截，而佢傳中只係得一次。作為車仔掂波最多嘅人，但傳球成功率係兩隊正選最低嘅69%，可見曼城壓逼得好勁，同埋車仔喺右邊回防支援嘅人唔夠，令到佢攞到波都畀唔番出去。
其實喺賓尼迪斯上任車仔主帥後，加利尼維利就喺專欄指出呢個問題，建議佢檢討呢套3核齊出嘅戰術，唔知賓帥會唔會考慮吓呢？
文：咖喱