發展局長陳茂波明明知道自己家族公司投資劏房，竟滿口謊言話自己唔知，被傳媒踢爆後又扮聾耳陳，當冇件事，老闆梁振英又唔理，任他繼續做局長，吹咩？飲咗酒駕車，連一句道歉都冇，又吹咩？梁振英新政府上場不足五個月，已經辣㷫香港市民，局長連番沒誠信都冇後果，一副你吹得我脹咩的態度，非常之乞人憎。就連梁振英本人也是如此，山頂大宅僭建明明講大話，早知有一個二百呎僭建地下室，還自己砌磚牆封住，都不在最初被揭僭建時和盤托出，擺明蓄意隱瞞，還厚顏說自己冇誠信問題，他所恃的是甚麼？不亦是你吹得我脹咩？沙膽虹睇到這些新聞，真的激氣到血壓也馬上飆升！
不少人對梁振英及局長的冇誠信醜聞，都只能無奈，甚至越來越麻木。「係咁㗎啦！」、「又冇人郁到佢！」沙膽虹好同意李平兄昨日在《蘋果》社論所言，「香港媒體，市民如果日感無奈而沉默以對、沉默忍受，正正遂梁振英所願，讓北京錯以為特首的誠信問題不會影響管治。」香港仍有寶貴的言論自由空間，《蘋果》、《爽報》和沙膽虹就要珍惜機會，口誅筆伐這些無恥無賴特首和高官。
沙膽虹