菲菲剛完成日本之旅，撞正日圓狂跌，使錢都開心啲。遊客開心，但日本人睇怕要含住泡眼淚講「Arigatou」。日圓貶值因經濟太差，市場憧憬量寬，點計都唔係開心事。
話明「迷失10年」，日本經濟要步出迷霧唔係咁易。最近外地一篇報道話日本其實手執救經濟嘅秘密武器──「女人」。
報道引述高盛數據，話日本女人生仔之後，10個有7個會轉做全職師奶；仲話如果女性勞動人口由目前60%跳升到80%，GDP將大增15%，從而力證「女人仔救國」之絕世好橋。
其實，呢個說法的確唔係冇道理。菲菲一個絕頂聰明嘅女會計師朋友，早年過日本打工，最近嫁埋日本人，更將為人母，佢同菲菲講，屋企人希望佢生咗仔就辭職。當地思想傳統，變相浪費優才。今時今日，男女能力相當，如新政府上場後能推動「女人救國」運動，或者就係日本嘅出路。
Fifi
本欄逢周二、四刊出