早喺幾年前，有次喺商台同火燎森做節目時，我倆講到呢場金融海嘯嘅結局，將會有機會打仗。而未雨綢繆，究竟喺邊度先安全。最後，我哋就話應該係新西蘭，因為勝在夠山旮旯。
節目出街後，唔少網友又喺度話我哋譁眾取寵，一味靠嚇，完全無視我哋有咁嘅分析，係因為我哋見到歷史有無數嘅例子，當出現金融動盪，債仔債主講唔掂數，最終武力解決。
早前卒之出現咗一個可以引致打仗嘅情況。禮拜日，佔西班牙GDP百分之二十嘅加泰羅尼亞舉行選舉，分裂黨大勝。我facebook見好多朋友問：「咁係咪等於巴塞入法甲？」
分裂要先搞公投
不過，最大問題係，如果分裂，西班牙嘅國債邊個孭？GDP忽然少咗百分之二十，西班牙條數點還？
當然，要分裂，先要公投。搞唔搞得成公投就係關鍵。首先，想唔想搞公投。當我問獅子山學會嘅王弼時，佢話：「咁加泰羅尼亞嘅銀行點先？係咪唔使人救先？要西班牙中央政府撐嘅話，咪走唔到囉。」就算西班牙救唔到啲銀行，不過當你綑綁加泰羅尼亞同西班牙其他區域嘅銀行，就會too big to fail，有人救。
就算想搞公投，見利比亞、埃及、意大利同希臘嘅例子，領導人隨時被「革職」。講真，當你嘅權大到可影響千億歐元計嘅債券，用零點幾個百分點嘅錢就可被收買，真係原居民話齋，唔好話民族、民意，真係祠堂都出賣得。
最後，就係就算你舉行公投，我可以保證到時一定天下大亂，內戰、暗殺、西班牙國債債權人資助「反分裂」份子搞事，直情1967年香港暴動咁。
到時，巴塞入唔入法甲我唔知，不過新西蘭就會好吸引，而有如Nathan Rothschild話，到時就係買股嘅大好良機。
孫柏文
獨立股評人
http://facebook.com/shuen
本欄逢周二刊出