今年年尾政商界好多喜事，繼恒生銀行（011）前一姐梁高美懿嫁女、晶剛世紀婚禮之後，前經濟發展及勞工局局長葉澍堃呢個星期六（1號）亦娶新抱，佢做投行嘅大仔葉瀚林（Hiram）同拍拖十年嘅女友Connie拉埋天窗了。
1號行禮 15號四季擺酒
Hiram冇受阿爸影響，走去打政府工或者從政，佢大學畢業後就投身金融界，做咗一年分析員後，就轉咗去做iBanker，一做就做咗9年，6年前加入摩通。摩通投行分好幾隊人，中國同香港市場唔同team，Hiram就屬於香港業務嗰隊。
據收到佢個紅色炸彈嘅朋友講，Hiram分開兩日辦喜事，12月1號下晝喺教堂行禮，15號先至喺中環四季酒店擺酒，筵開30圍左右。佢未婚妻Connie係同行，喺另一間外資投行做iBanker，聽講兩人畢業後喺同一間投行做嘢而認識，拍拖十年，期間不時耍花槍，不過嗰啲都係歷史，最緊要係兩人周六一齊步入教堂！
最開心嘅可能係榮升老爺嘅葉澍堃，佢07年退休後，不時同太太或政商界朋友四圍旅遊、飲飲食食嘆世界，得閒又入吓馬場，好不快活，家陣只係61歲，話唔定好快做埋阿爺，弄孫為樂，咁嘅退休生活認真爽。
李華華
mailto:[email protected]