內地最大拍賣行之一嘅保利，過去兩日在港舉行首次拍賣會，共拍409件精品，包括油畫、中國書畫、古董同珠寶，成交價最高係張大千嘅《番女掣庬圖》，以4830萬元成交，較底價720萬高5.7倍；第二高價係朱德群《紅肥綠瘦》，以4025萬元成交，較底價高4倍。
拍賣會總成交額5.2億，較保利原先估計嘅4億元高，如果唔係部份精品流拍，總成交額應該更高。今次162件中國書畫同187件古董，以件數計，成交率分別係64%同70%。
北京保利拍賣董事趙旭指，收藏同奢侈品有關，家經濟形勢唔樂觀，買家資金比較緊張，拍賣成績已經唔錯。保利將會定期在港舉行春、秋兩次拍賣，好多收藏家同買家睇中保利由華人管理，溝通親切方便。
酒店包房 只此一次
保利亦喺君悅同萬麗海景酒店訂咗200間房招呼嘉賓，但趙總講明，首次來港拍賣先咁做，以後唔會。