【拆局】
崩牙駒將重見天日，有消息透露，街市偉早前透過中間人與崩牙駒達成協議，二人同意以「搵錢為先」，昔日私人恩怨暫時放低。「佢兩位大哥當時雄霸澳門，有時間玩槍玩炸彈，但時移世易，家一個啱啱放監，近乎由頭嚟過；另一個差啲連賭場都冇埋，仲玩？」
65歲的街市偉原名吳文新，又名吳偉，早年拜於14K「黑白無常」門下，因常在旺角街市打躉而有此綽號。有指他早年在港犯案被迫遠走菲律賓，靠撈賭而風生水起，其後獲賭王何鴻燊邀請到澳門發展賭廳。90年代他扶植尚未上位的崩牙駒，殺退同門摩頂平稱雄黑道。
未幾崩牙駒坐大，二人交惡。傳聞他當年難以獨力箝制對方，遂借刀殺人，把另一黑幫猛人「水房賴」拉入渾水，弄至三雄相爭，繼而發生回歸前連串槍擊及謀殺案。96年街市偉的新世紀酒店開張前夕，被人以AK47步槍掃射，有傳與崩牙駒有關。
街市偉遇襲後曾透露，致力要把公司及旗下娛樂場重新搞好，甚至在澳門、南韓以至越南開新賭場。但有分析指，他重掌的奧馬仕在希臘神話娛樂場的股權被大幅攤薄，而背後賭場控制權其實仍在已反目的前女友陳美歡手上，街市偉翻身不易。
《蘋果》記者