已故「愛國商人」霍英東，其家族之前因為爭產風波，未答應捐錢畀母校皇仁書院搞150周年校慶，噚日皇仁書院負責校慶晚宴籌款嘅校友話，已經收到「老校友」霍家同何家（何鴻燊）捐款啦，下月9號喺會展擺190席，有成2,300人出席。
皇仁舊生兼中大校長沈祖堯預告，校慶晚宴會同前食物及衞生局局長周一嶽演唱㖭。不過委託中大做嘅口述歷史計劃就做到「半桶水」，原本計劃訪問80名校友，家因為籌款不足，只可訪問40位老校友。皇仁仲由噚日開始，一連兩個星期，喺中央圖書館搞咗個展覽，介紹下皇仁文物、猛人校友。