「其實你不需要向我出櫃。」不需要用假名，不需要掛口罩，蔡家聰就是如此堂堂正正，端坐在公司會議室內，講述自己向上司「出櫃」的經驗：上司不但沒驚訝，更因感到受信任而感動落淚。從此，蔡家聰可以「唔扮嘢、做自己」，大方分享與男友的生活點滴。作為跨國公司人力資源部主管，蔡家聰對公司為同居伴侶提供與已婚員工一樣的福利，感到自豪。
在高盛工作了12年的蔡家聰（Paul），現職人力資源部執行董事，多年前以支持者身份，參與公司同志友善網絡（LGBT Network），三年前決定向上司出櫃，「雖然個網絡係無分性傾向，人人都參加得，但因為自己越嚟越投入，上司亦都好鼓勵我參加，令我覺得唔可以再唔同佢講」。
英籍上司獲信任感動落淚
Paul的上司是英籍女性，對他突如其來出櫃極為感動，「佢當時即刻喊咗出嚟，但佢唔係驚訝，而係開心，佢話我其實唔需要向佢出櫃，好感謝我對佢嘅信任」。
從此Paul終於可以「唔扮嘢、做自己」，「同同事傾偈，唔需要扮假期同屋企人飲茶、放長假同阿爸去旅行，覺得舒服好多，個人整體啲，以前放工前，要好proper（循規蹈矩）、好『直』，放工後就同同志朋友hang out（交往），好似活喺兩個不同世界咁」。
他笑言，同志大部份有「特異功能」，「好叻㗎喎我哋，以前一聽到人講結婚生仔，我就會自己行開咗，聽到有同事講識咗個乜女仔，我又會engage（參與）到落去個討論度，但又唔會辣到埋自己身，喺唔同場合去包裝自己」。
他希望自己可起帶頭作用，「等新入嚟嘅同事覺得，如果有一日佢想行出嚟（出櫃），係OK嘅」。事實亦是如此，「有個女同事一路都唔係好確定係咪想come out（出櫃），點知有一日佢喺email度同我share（分享）咗，我希望自己多多少少幫到其他人pave the way（鋪路）。」
同志員工亦獲產假領養假
高盛於2005年成立同志友善網絡，初時只有數人，至今單是亞太區已有270人，佔員工總數百分之七。公司為員工提供「Out in the Open」培訓工作坊，要求員工用五分鐘分享生活，但內容不能提及子女、伴侶等，蔡家聰說，有同事形容那短短五分鐘仿似在地獄，「因為唔想講大話，所以好辛苦，從中體會到原來同志每一日都面對嘅挑戰」。
高盛為同居伴侶（Domestic Partner）提供與已婚僱員一樣的福利，包括四個月產假、八周領養假、2,000至5,000美金（約1.55萬至3.88萬港元）領養津貼、喪假等，員工只要提供12個月共同生活的住址證明。作為人力資源部的主管，蔡相信措施有助挽留人才，「我唔覺得有人會專登去呃福利，呢樣嘢嘅象徵意義大過真正意義，因為同志本身都比較少有仔女，就算領養，個銀碼都唔係咁多，但對吸引人才好有幫助」。