異動空間:一拖破位睇九蚊 - 魏力

異動空間:一拖破位睇九蚊 - 魏力

消息指國際貸款人對希臘削赤的措施,已接近達成共識,意味希臘下周可獲吊命錢,唔使破產。歐元兌美元抽穿1.29,加上A股冇再插穿2000關,都利好市場氣氛。

強國樓市復蘇,但A股就衰足3年,有說股市唔得,資金轉去炒樓。不過,股樓從來是一脈相承,卻有先後之分,咁諗方向就明朗得多,A股明年跑贏樓市機會大,戰友可逐步收集安碩A50中國(2823),等出年食大茶飯!
中央公佈一號文件,「把農業科技擺上更加突出位置」,即係阿爺會呵護多啲,早排推介的天業節水(840)及中化化肥(297)固然可留意,但論基金的掃貨目標,首選仍是第一拖拉機(038)。
一拖主攻農業機械產銷,大中小型輪式拖拉機一應俱全,可謂提升農業產能的必要工具。首三季純利3.26億人仔,按年微增2.9%,每股收益37.81分,以今年經濟環境而言,業績算有貨交。以全年EPS為50分計,預測PE為11倍,仍屬偏低水平。
技術上,一拖已突破6.80元橫行區阻力,長期下降軌阻力位於7.40元,不排除會先整固再上衝,建議可現價先買一注,待後抽完成時再加碼,中線以15倍PE為目標,睇9蚊。

魏力
http://www.facebook.com/2012jason