【特稿】
雖然「主要對手」亞視零威脅，但兩家收費電視有線及now TV近年積極開展廣告業務，成為不少廣告商的另類選擇，TVB亦不敢怠慢，近年以更多折扣利誘客戶不在有線及now落廣告，盡顯「霸」氣！
TVB一方面飛擒大咬加廣告費，另一方面則以折扣優惠狂搶有線及now客戶，據一名無綫銷售部的員工透露，「為咗吸多啲廣告，只要個客響我哋度落大份啲，我哋就會畀折扣優惠，如果個客應承唔落有線同now，我哋會再俾多啲discount㖭。」
如只在TVB落廣告 平達20%
一家全港有近千家分店的上市零售集團行政總裁亦直言，「如果獨家響TVB落廣告，佢會再平多15至20%，所以多數都淨係落TVB。」他絕對歡迎有新免費電視台推出，除了廣告費有機會下調，亦不想被一家電視台獨攬市場。
目前於TVB、有線及now都有落廣告的專業旅運，其市場及業務發展總經理劉美詩表示集團在TVB幫襯了翡翠台、高清翡翠台及互動新聞台三個頻道。雖然劉美詩大捧TVB場，惟她亦認為傳統的電視節目變化太多局限，期望有新的營運商帶來突破。同樣於三家電視台均有落廣告的耀才證券行政總裁陳啟峰表示，「觀眾係得咁多，多啲電視台唔會多咗觀眾，始終都係要看收視」。但相信增加競爭後，TVB的廣告費會有所下調。
《蘋果》記者