信義玻璃（868）主席李賢義因親家張高麗躋身中共政治局常委而人氣急升，所謂人怕出名豬怕肥，李主席上周五出席一個傳媒聚會時竟然玩快閃，同一班營口市官員現身一陣，hi完就bye，費事俾人問佢有乜感受咁款。
信義行政總裁董清世即刻幫老闆解畫，指信義有成23年歷史，公司發展同李生嘅親家冇乜關係，叫大家唔好諗咁多。
睇資料，張高麗千金張曉燕同李賢義個仔李聖潑，結婚12年，好似定居香港。雖然兩人結婚冇信義成立咁耐，但信義真係發展得越來越好，05年來港上埋市，李聖潑婚後仲獲長和系主席李嘉誠嘅創投基金入股佢嘅科技公司，睇來都係新抱腳頭好囉。