移民美國加州多年嘅會計Ｍ，回港探母，順便申領六千大元加利息二百，雖然唔夠佢買來回加州─香港機票，但足夠津貼佢留港兩星期使費，幾開心吖，與加州不停加稅比較，香港人幸福好多！加州今年十一月六日又投票通過加稅嚟支持中小學教育嘞，原因係州政府要大量削赤，但教育係大件事，惟有特別為咗教育經費向加州人伸大手板要錢，話明（係咁話啫）根據Proposition30取得之新增稅項，全部撥歸教育預算。
會計Ｍ在觀塘讀中學時，曾遇上一位新亞書院經濟系學生到學校當兼職教師，教簿記，會計Ｍ從此得到啟發，考LCC證書如斬瓜切菜，中學畢業就搵到一份會計工作，支持家姐上大學，自己邊做邊考，卒之考到ACCA等等會計師資格，後來成為一間大出版社嘅會計主任，每逢有年度大減價開放日，就會給左丁山一個電話，走去執平書。移民美國後，報考美國CPA，全無難度，三幾年後再次成為一間美國公司嘅會計主任，今日美國失業率高企，好多人搵唔到工做，但會計Ｍ從來未驚過失業，轉工話咁易，每次轉工前都被強烈挽留。
會計Ｍ好念舊，呢日走上左丁山寫字樓坐一坐，問佢忙啲乜，佢笑嘻嘻咁話：「我本來在澳門出世，九歲先至跟阿媽來港與父親團聚，家澳門政府咁好，年年有錢派，我咪返去申領番澳門身份證囉。返到去問清楚，原來澳門人幸福過加州人好多，澳門冇失業冇乞兒，政府派錢養老，津貼多籮籮，我同阿媽計過，佢如果返澳門住，一年可以攞到政府六萬銀。」咦，仲唔返去，留在香港做乜，貪香港生果金過多咩！會計Ｍ話：「你有所不知，正因為澳門冇窮人，好難好難請到家傭，政府又怕工會反對，請菲傭印傭係好難好難嘅，阿媽現在由菲傭照顧日常生活，冇可能一個人住在澳門嘅啫。」原來如此，澳門政府咁有錢，派咁多福利，皆拜自由行所賜，有咁多內地人到澳門賭錢，進貢賭場，賭場向政府交稅，政府橫掂冇法子使，不如送番一部份俾五十萬澳門人啦。香港人口多澳門十幾倍，又冇賭場，唔恨得咁多嘅咯，不過，賭場生意唔知會唔會有千日紅，澳門應該向挪威學習，成立一個賭稅盈餘基金。