後日首次喺亞博館舉行香港個唱嘅拉丁天后籮霸珍妮花洛庇絲（Jennifer Lopez），前日喺上海奔馳文化中心開騷，吸引過萬粉絲到場，引致場地附近一帶大塞車！前晚開場嗰陣，籮霸一身拖地白色長裙，仲喺一班戴高帽着燕尾服嘅男舞蹈員，包括佢個嫩口男友Casper Smart抬出場，十足母儀天下，既華麗又駕勢！好快就除低長裙嘅佢，身穿招牌金色緊身歌衫，拿起閃閃士的棍，不停勁歌熱舞，仲強烈扭動招牌靚籮，甚至同男舞蹈員大跳貼身火辣舞步，跳到咁激梗係令全場尖叫啦。
原定聽日下午至來港嘅籮霸，已決定今晚完成馬尼拉演出後，隨即同子女、男友同埋個唱大軍乘坐私人機，喺聽日凌晨1時左右抵港㖭。