【中環dragon-i】現年37歲嘅名模陳嘉容（Eunis）自從07年同髮型師老公郭子輝離婚後，感情事就更低調，不過噚日凌晨12點幾，佢喺中環dragon-i十周年嘅派對中突然大解放。
型男笠頭遮樣
飲到high high哋嘅Eunis成晚拖住年約30歲嘅南亞裔型男，兩個好似熱戀中嘅情侶咁，拖住周圍遊周圍飲，情到濃時忍唔住就咀。
玩到約凌晨3點幾，Eunis拖住新歡離開，出到門口遇見記者影相，嚇到佢即刻醒晒，南亞裔新歡仲嚇到用帽笠頭又用手遮住自己個樣。問到係咪新男友？Eunis支吾以對，只話係朋友，仲叫記者唔好嚇親佢㖭。Eunis以為答咗記者嘢就算係打發記者走，同新歡行遠少少又情難自禁企街打茄輪，之後再發現有記者，就同新歡搭的士返歸。
採訪、攝影：陳辰、徐錦池、吳耀輝