八十年代的開心少女，由第一代的羅明珠、李麗珍、林珊珊到羅美薇、袁潔瑩、陳加玲，各有不同的性格，稱得上真正開心少女，非羅明珠莫屬，15歲半入娛樂圈，吱喳開心少女形象深入民心，雖經歲月洗禮，羅明珠仍是那般開心，只不過多添一份成熟而已。撰文：羅美倫
現年44歲的羅明珠跟出道時分別不大，只是英文名由昔日的Bonnie變成今日的Sheree，特別是她說話速度之快，至今未變。早前珠女出席公開活動時狀態不好，肥腫難分，原來因身體失調，經半年針灸調理再加運動，那些年的羅明珠回來了。
一分鐘蝕百萬
細數當年，原來她只拍了四年戲，珠女說：「我84年暑假出道，第一套拍《開心鬼》，88年就去加拿大讀大學，93年讀完大學返嚟做金融，之後都拍過戲，好似同劉德華嘅《賭俠1999》、任達華嘅《正將》等，不過都係客串性質。」
除了拍戲，珠女還有一段歷史，98年跟拍拖三個月的王培宏結婚，但婚姻只維持了兩年，其間男方因涉嫌用假卡惹麻煩，珠女捱義氣為他奔走籌謀，但一切都已成往事了。至於她現在的感情生活，珠女爽快地答：「家有拍拖，係圈外人，所以唔好提咁多，唔會諗結婚，結過一次唔結喇。」
當年珠女曾在股壇有一分鐘蝕一百萬的「成績」，並說過不再玩股票，但現在依然從事金融工作，她招牌式儍笑：「當時讀完書返嚟學人第一次炒股票，但有咗經驗就有進步啦，通常啲人話唔掂唔再買咪又死死氣再買，輸完都要買，我家已經專業、審慎咗！」說到底，增值自己才是最重要，珠女深明此道理，06年花了近兩年時間，在北京長江商學院修畢高級管理人員工商管理碩士課程，她說：「其實我一向鍾意讀書，由細到大讀得唔差，想增值自己，嚟緊會讀珠寶鑑證。」
開心鬼真撞鬼
在娛樂圈雖只得四年，但珠女十分懷念拍戲的歡樂時光，她說：「嗰時因讀緊書，拍完戲就即走，佢哋好多趣事我都唔知，但試過一次遇怪事，喺泰國拍《開心樂園》有晚同鄭浩南（Mark）、柏安妮去完夜市返酒店，見黃百鳴間房房門開晒，佢哋成班人坐晒喺度，我哋入房，李麗珍、陳加玲、羅美薇同袁潔瑩個個又嗌又喊，唔知乜事，我同Mark坐喺櫃邊好奇怪嗰陣，有工作人員入門口，我感覺到櫃裏面有人敲出嚟，嚇到我同Mark即刻大叫撲去對面班女仔度，Mark男人老狗都驚呀，原來有人入嚟，裏面就有敲門聲，好得人驚，結果嗰晚幾個女仔一齊瞓。」
與珍妹成莫逆
一班青春少艾同一間公司，會爭寵多是非嗎？珠女坦言：「小朋友總會有你唔抵得我，我唔抵得你嘅，讀書都有啦，但小朋友點會有隔夜仇，過咗就唔記得，都係開心回憶，如果家再齊人拍一套戲唔知會係點呢？」珠女第一部電影就跟李麗珍合作，但那時她跟阿珍並不熟絡，直至最近兩人做了街坊，經常相聚，反而成了好朋友，珠女說：「阿珍比較靜，但我好欣賞佢敢愛敢恨嘅性格，佢同我嘅共通點都係唔識保護自己，家我揀朋友重質唔重量。」