安坐家中，玩吓game，拍吓片就穩袋12萬，學歷、經驗不拘，只要係宅男宅女就可應徵。八方唔係講緊警訊嘅求職陷阱，而係PlayStation同香港互聯網創作及藝人協會合作，招募「遊戲判官」，每月試玩至少兩個新遊戲，然後拍片上載YouTube介紹同評分，如吸引成千上萬機迷瀏覽，咁就可以輕鬆月入兩萬，合約期半年。
宅男宅女至適合
SCEH香港董事總經理項明生同八方講，唔少後生仔女鍾意匿埋屋企打機，呢份筍工啱晒佢哋，又話網片係潮流趨勢，年輕人覺得幾千字嘅game評好難消化。佢提醒應徵嘅宅男宅女，要拋頭露面，「有啲人從來唔出樣，大家唔知佢係男定女」。
應徵者由即日至下月13日，提交一段五分鐘短片，以評論PlayStation遊戲為題，下月22日喺「亞洲遊戲展」中公佈結果。
著名YouTube用戶「伍公子」係評審之一，佢教應徵者評game之餘，可借題發揮講時事，引起共鳴。