「成也伊巴，敗也伊巴」，呢句話可以講係近年前鋒伊巴謙莫域效力球隊嘅寫照，因為只要呢名瑞典前鋒在陣，球隊基本上穩袋3分，但只要佢缺陣，就通常失分。喺上周六又係咁嘞，停賽期滿復出嘅伊巴梅開二度，助榜首嘅巴黎聖日耳門（PSG）勝出之餘，佢個人嘅職業聯賽生涯入球數字更突破200大關㖭！
入生涯201球
伊巴雖然失意於今夏嘅歐國盃決賽周，但喺新球季轉投法甲嘅巴黎聖日耳門之後，就無論於球會級定國家隊嘅賽事，都表現神勇。喺上周六聖日耳門迎戰特魯瓦嘅聯賽，停賽期滿嘅伊巴演有如猛虎出柙，喺作出咗兩個靚助攻畀隊友，令球隊領先2:0之後；佢自己亦入咗兩球，助球隊以4:0大勝。值得一提嘅係呢兩個入波，亦令31歲嘅伊巴喺歷嚟聯賽嘅入球，突破咗200大關，共獲201球，而今屆合共喺所有比賽入咗14球，認真威威。
難怪聖日耳門教練安察洛堤賽後亦話：「以伊巴嘅質素及天份，佢今日咁嘅表現係好平常啫！不過，佢對己隊實在重要，有佢喺前線，球隊基本上有入球保證。」
PSG自爆A高爾加盟
雖然聖日耳門目前喺聯賽榜領導群雄，不過日前球會就發生咗啲蝦碌嘢。聖日耳門嘅官方twitter賬戶，竟然喺上周六刊登出車路士後衞艾殊利高爾（A高爾）喺來季會加盟嘅消息，段報道仲實牙實齒咁話，由於艾殊利高爾已被藍戰士新帥賓迪尼斯告之，佢唔喺球隊嘅長遠發展計劃之內，所以決定離隊。
雖然呢段嘅咁消息好快就鏟走咗，但聖日耳門咁事先張揚法，相信艾殊利高爾嘅加盟，絕對係遲早嘅問題。