謝瑞麟（417）早年經歷風風雨雨，謝氏家嫂臨危受命掌管公司，近年先叫做重新上路，原來公司亦有成15年冇拍電視廣告。COO陳立業（Lambert）早排漏口風，話謝瑞麟返來喇，呢個星期再推全新電視廣告，但就懶神秘唔肯講主角係邊位，總之周三首播，有微電影feel，希望進一步做好個品牌咁話。
查實謝瑞麟曾經推出過經典嘅電視廣告，主角咪就係近期做警務處副處長做到紅爆嘅郭富城，女主角咁啱又係楊采妮。
佢兩位廿年前合作拍呢個謝瑞麟廣告，楊采妮送個刻住「情」字嘅足金金牌畀郭富城，幾咁有情懷！但現實啲講句，家金價咁高，當年收到嚿金嘅，今日應該好高興。