劉嘉玲前晚在中環出席慈善活動，她表示有留意近日疑有藝人於徐淑敏丈夫經營的食肆吸毒，她表示不應做犯法的事，她坦言亦曾受過誘惑，幸她夠定力。
劉嘉玲、Mandy Lieu和傅嘉莉等，前晚在中環出席皮具品牌舉行的慈善活動，嘉玲穿上低胸藍色晚裝再配上藍寶石首飾現身，閃爆全場。嘉玲表示近日有看李安執導的電影《少年Pi的奇幻漂流》，大讚故事感人。
近日爆出有藝人曾經於徐淑敏丈夫黃浩經營的食肆吸毒，嘉玲表示有留意新聞，她說：「無論藝人定係公眾人物都好，首先唔應該喺公眾場合做犯法嘅事，損害健康，啲人太唔識諗。」會否影響藝人形象？嘉玲說：「唔會，要理智啲去睇件事，如果要戴有色眼鏡始終會戴，真實版本冇人會信，因為人本身已set定答案，事情要多方面去睇，人誰無錯。」
「要睇自己嘅定力」
問嘉玲多年來可曾受過毒品誘惑？她說：「冇人夠膽誘惑我，呢啲要自己決定，多年來唔好嘅誘惑梗係有，不過要睇自己定力。」可有見過藝人吸毒？她有保留說：「我唔會講，都唔係淨係呢行，有啲國家係合法嘅。」下月8日是嘉玲47歲牛一，她說：「偉仔仲趕緊《一代宗師》，我生日都要做嘢，生日唔係好大件事，等我大壽先慶祝，如果佢要做嘢唔緊要，人唔到禮物到就得，佢有時都會尋寶畀我。」
黃浩有明星吸毒片
黃浩對於被指有明星集體在其餐廳廂房吸毒，全程被閉路電視拍下，他昨日在電話中說：「噚日警方係問過我係咪有藝人吸毒嘅片，我話係有，咁警方問我可唔可以交出，我就答會先同律師研究，如果警方真係強制要求，我都會配合。」問到片段中有份吸毒的明星近日有沒有聯絡過他？他說：「當事人冇直接打過來，但其中有兩位搵過朋友打嚟了解。家因為警方已介入事件，我都唔想講咁多。」
採訪、攝影：顏英儀、葉雪