在這個由手機及平板電腦稱霸的年代，電視及掌上遊戲機漸趨式微，由窮小子變做董事的SONY電腦娛樂香港董事總經理項明生（James），亦深明十部遊戲機比不上一部iPhone的道理；有「橋王」之稱的他早着先機，轉戰social media（社交網絡），更用日薪一萬元請Youtube知名用戶幫手拍「Cult片」宣傳。記者：陳新政
「橋王」靠賣家傳戶曉的遊戲機PlayStation上位，期間度過不少「絕橋」，例如02年在香港首創亞洲遊戲展，一開就開足10年，以明星來包裝，前年的代言人是陳冠希，去年是Twins，今年則請來鄭伊健。「最初可以打機嘅Show係我哋搞，跟住動漫展都有引入遊戲機元素，我唔會話佢抄我哋，但我的確帶起咗呢股打機風氣。」
上討論區追蹤熱門話題
靠明星效應推銷，講出來好像每個Marketing都識做，James亦開始思考如何在這個資訊科技發達的年代，宣傳自家產品，「我好佩服三星電子總裁李健熙講嘅說話，雖然三星家可以搶到Apple嘅市場，但佢好有危機意識，成日同員工講，家啲智能手機喺10年之後就會變成廢鐵，就好似科網股咁爆破晒，因此時刻要保持創新感。」
項明生想以另類宣傳方法，分擔過於公式化的「明星硬銷」手法，他亦不諱言有向壹傳媒（282）取經，「家有邊個後生仔會揸住報紙？個個都用手機睇動新聞，直到Youtube有得播，我就知道搞social media有得諗。」
最初找理大學生幫手拍短片，效果不錯，之後為了跟貼潮流，又經常上高登討論區，捉摸年輕人的心理及話題，「做咗『巴打』，知道後生仔最近hit啲咩。」其後他發現除了文字，以教人煮食及諷刺時弊等「無理頭Cult片」，竟然是本地最受歡迎的原創短片，「好似Lou記玩寸facebook，Cooking hayhay教人煮嘢食，就連爛口LEO狂講粗口三字經，都有幾萬人Subscribe（訂閱），呢種網絡文化係好特別。」
日薪一萬請人拍Youtube
於是James找來製作這些「Cult片」的業餘人士，「我出一日一萬蚊人工，重賞之下有勇夫，創意同靈感就會湧出嚟。佢哋本身喺Youtube有拍開片，都有幾萬個追隨者，啲追隨者睇完片又會喺facebook同討論區share出去，個傳播能力好強大。」
韓國歌手PSY首本名曲Gangnam Style亦是靠網上傳播而走紅，目前在Youtube點擊率有逾7.7億點擊率，雖然James的低成本製作不能與之相比，但他拍成的「真人版—鐵拳快打」亦有95.8萬點擊，以本地製作短片來說，已是十分好的成績，「我用公司10蚊，就買到50蚊嘅貨，而且條片永遠都擺係度（Youtube），廣告播完就冇。」同樣是廣告，相比投資數千萬電影預告片、歌星MV、甚至三星熱賣的智能手機廣告，觀看James拍「Cult片」的人數更多。
James形容玩social media已「玩上癮」，除了幫公司宣傳，更幫到一班有創意的「80、90後」年青人，「一萬蚊日薪對公司來講唔算多，但對嗰班後生仔就係一筆大數目，至少俾佢哋可以由理想變成搵到食，留住一班有創意嘅香港人。」
項明生（James Hong）
•出生於上海，16歲時移居香港
•1992年及1996年分別在香港大學文學院及中文大學工商管理學院畢業
•1992年畢業後加入富士，負責推銷菲林及相機
•1997年加入SONY
•2002年創辦每年一度的香港電子遊戲業展覽會亞洲遊戲展
•2007年在天水圍舉辦大型招聘會，被譽為良心僱主
•2009年獲選為香港影視娛樂博覽「數碼娛樂風雲人物」
•2009年底出版旅遊散文集《足足五千年》，籌得50萬元善款
•2011年9月正式成為SONY電腦娛樂董事，亦是SONY首位華人董事