【交流經驗】
除了成為日本公司的華人董事，項明生另一身份是旅遊作家，足跡踏遍超過50個國家，他旅行後將經歷出版成書，再將收益捐給慈善機構，他的「自遊行」貼士是，「保持低調，盡量用便宜貨或當地產品，以及出發前搜集資料，了解當地文化。」
當大家認為賺第一桶金是一百萬的時候，James卻認為他的「第一桶金」卻是8000元美金，「89年嗰時仲讀緊大學，兼職教夜校，賺得70蚊一個鐘，慢慢儲到8000蚊美金，就去咗歐洲旅行，一個人露宿搭順風車，係好好嘅經歷。」
其後旅遊過的國家越來越多，他開始出書寫旅遊指南及感想，收入捐予小母牛慈善基金，「令我覺得自豪嘅係，我出咗關於古巴、巴西同秘魯嘅旅遊書，我寫之前香港未有人寫過，試過有讀者跟住我嘅指南去玩，之後返嚟向我update景點資料，咁我就喺電子書度更新，呢種交流經驗夠晒實際。」
「投資旅遊勝名牌」
對於巴西等新興市場，他形容治安其實不比內地差，並指一個人外出旅遊最緊要是低調，「唔使帶太多貴重嘢，好似我個袋仲喺當地市集買，人哋仲以為我係本地人，冇人打劫我。」明年目標是到南極探險，「去一轉要使十幾萬，但我覺得錢帶唔走，投資喺旅行得到嘅經驗同財富，比金錢更珍貴，好似我去玻利維亞嘅天空之鏡，坐一程車都幾千蚊，但我唔會拎嚟買名牌。」